Xəbərlər

14 sentyabr 2025-ci ildə Bakı Konqres Mərkəzində keçirilən beynəlxalq “Comic Con Baku” pop-mədəniyyət festivalında Dongfeng Azerbaijan özünün ən son elektrik sedan modeli EP007-i ilk dəfə ictimaiyyətə təqdim edib.

Festival gənclər arasında pop-mədəniyyət, oyun və yaradıcılıq sahələrini bir araya toplamaqla yanaşı, həm də yeni texnologiyaların nümayişi üçün mühüm platformaya çevrilib. Bu çərçivədə Dongfeng-in təqdim etdiyi EP007 avtomobili ziyarətçilərin böyük marağına səbəb olub.

Şirkətdən verilən məlumata görə, EP007 modeli müasir dizaynı, ekoloji cəhətdən təmiz elektrik mühərriki və qabaqcıl texnoloji xüsusiyyətləri ilə seçilir. Avtomobilin interyerində süni intellektə əsaslanan idarəetmə sistemi, geniş multimedia paneli və sürücü üçün təhlükəsizliyi artıran ağıllı funksiyalar təqdim olunub.

Sərgi iştirakçıları EP007-in canlı təqdimatını izləməklə yanaşı, avtomobilin texniki göstəriciləri, batareya gücü və sürət imkanları barədə ətraflı məlumat əldə ediblər. Ziyarətçilərə həmçinin yaxın zamanda test sürüşlərində iştirak etmək imkanı da vəd olunub.

“Comic Con Baku”nun minlərlə tamaşaçı cəlb etməsi EP007-in daha geniş auditoriya qarşısında tanıdılmasına şərait yaradıb. Tədbirdə iştirak edən avtomobil həvəskarları yeni modelin dizaynını və texniki imkanlarını yüksək qiymətləndiriblər.